Bertsozale Elkarteak Villabona-Amasako Subijana etxean duen egoitza oihal lantoki ezaguna izan zen 1860tik 1980ra bitartean. Emakumezkoak ziren langile gehienak, eta haiek omentzeko ekitaldia egin dute gaur. Eraikinaren iragana eta oraina lotzea izan da helburua, emakume oihalgileak omenduz, eta gaur egun Subijana eraikinaren ardatz den bertsoari tokia eskainiz.
Horrela, familia argazkia atera dute lehenik, garai bateko eta gaur egungo langileek. Gero, eraikinaren ganbarara igo dira. Bertan, Beatriz Unzue alkateak eskerrak eman dizkie iraganeko emakume langileei, eta bere lana aitortu du, baita gaur egun Bertsozale Elkarteak egiten duena ere.
Ondoren, Fanny Alonsok oihal fabrika zaharraren berri eman du, eta bertan lanean aritutako emakume adinekoak izan ditu gonbidatu. Anekdotak, bitxikeriak eta zenbait istorio kontatu dituzte. Guztiek ere, adiskidetasunean oinarritzen zen enpresa dela azpimarratu dute. Azkenik, Bertsozale Elkarteko Aritz Zerainek bertan gaur egun egiten duten lana azaldu du, eta berak ere fabrika hartan emakumeek egindako lana aitortu du.
Behin ekitaldia amaituta, azken asteetan Arantxa Orbegozok eta Izaro Lizarragak eraikinaren albo batean egin duten horma irudia inauguratu dute, eta bi artistek sortze prozesuaren inguruko argibideak eman dituzte bertan. Hariak eta oihalak dira protagonista horma irudian, eta oihal horietako batean Maialen Lujanbiok sortutako bertso bat ageri da idatzita. Emakumeen istorioak lehen planora ekartzeko beharra azpimarratu dute bi margolariek. Margolarien azalpenak entzun ondoren, Lujanbioren bertsoa eta gaur atera duten familia argazkia uztartzen dituen oroigarri bana eman die garai bateko langileei.
Honela dio Lujanbioren bertsoak:
Historiaren fardotik
saltatu ta tira
hamar lerro hitzezko
hamar metxa dira
lerrotik errimara
metxatik harira
kanillatatik pasa
ta ahotsa argira...
Eskuen memoria
bertsotan ari da
Ekitaldia borobiltzeko, bertso saio tematikoa egin dute Subijana atzealdeko Gudari plazan. Oihana Iguaran, Alaia Martin eta Nerea Ibarzabal aritu dira bertsotan; gaiak, berriz, Amaia Agirrek jarri ditu gaiak.
