Inauterietako astelehen goizaldean Ertzaintzaren pilotakada batek larri zauritu zuen gazteari elkartasuna adierazi diote Iturenen (Nafarroa). Izan ere, lotura du sendiak herriarekin. Babesa azaltzeaz gain, Tolosan larunbatean egingo den manifestaziora joateko deia ere luzatu zuten atzo Babes eta elkartasun osoa zaurituarekin. Biolentzia polizialik ez! lelopean eginiko elkarretaratzean.
Iturengo plazan bildu zirenek esan zuten «arduragabekeria hutsa» dela Ertzaintzak jendez beteta zegoen kale horretan izandako jokaera. Hala, «aski dela esateko» garaia dela nabarmendu zuten, eta lehenbailehen azalpen publiko argiak emateko eskatu zuten. Baita, kargaren agindua emateko ardura nork izan zuen argitzea eta neurriak hartzea.
