Villabonako Santio Txapelketa, XI. Antton Pebeten Oroimenezkoak, baditu aurtengo irabazleak. Lehenengo finala, Luixa IV-Otaegi eta Ayerza-Luixa III jokatu dute, eta bikote gorria nagusitu da 25-15eko emaitzarekin. Aipatu beharra dago, ordubetetik gora iraun duen partida izan dela.
Bigarren finala, eskuzko emakumezkoen mailan jokatu da. Larrarte bidaniarrak Gaminde bikote zuela, 22-10eko emaitzarekin gailendu dira Garai eta Erasun zizurkildarraren aurka. Partidako pilotari onena, Miren Larrarte izan da.
Azken finala, gizonezkoen mailan jokatu da. Irazustabarrena alegiarrak, Murua lagun zuelarik, 22-14 menderatu dituzte Arteaga-Loza bikotea, eta aurtengo Villabonako Santio Txapelketako irabazle bilakatu dira. txapelketako pilotari onenaren saria; Ander Murua arrasatearrarentzat izan da.
Bearzana pilotalekua, jendez lepo egon da gaurko finalak zuzenean jarraitzeko, eta txapelketako antolatzaileak gustura agertu dira jendearen erantzunarekin.
