Amasa-Villabonako Udalak antolatutako ekitaldi berezia, Villabonako Salbadora erretiratuen egoitzan izan da. Bertan, herriko alkate den Beatriz Unzue, Arantxa Lopez zinegotzia eta Lurgatz talde feministakoak izan dira besteak beste. Eguraldiak lagundu ez arren, herriko jende asko hurbildu da industria sektorean lan egin zuten emakumeen omenezko ekitaldira.
Unzuek, industrian sektorean lan egindako emakumeei zuzendutako hitzaldiarekin hasi du omenaldia. Amasa-Villabonara XIX-XX. mendeetan zehar heldu zen industrializazioa Subijana y CIA eta La Salvadora enpresa enblematikoekin. Belaunaldiz belaunaldi, emakume asko izan ziren bertan lan egin zutenak eta alkateak gogora ekarri ditu: «Gizarte patriarkal eta matxista hartan, industria enpresetan emakumeek egiten zuten lana gutxietsia izan zela». Horretaz gain, Unzuek aipatu du, «emakumeak ezinbestekoak izan zirela Villabonako industria aurrera ateratzeko, eta garai zail haietan, lan baldintzak hobetzeko eta aberastasuna banatzeko langileen borrokan eta grebetan, emakumeak hor egon zirela». Bai alkateak eta baita Lurgatz talde feministako kideek eskerrak eman dizkie egindako lan eta esfortzuagatik.
Ekitaldian, omenduak izan diren emakumeen testigantzak entzuteko aukera izan dute bertara hurbildutakoek. Hitzaldiak eta testigantzak amaitu ostean, emakume guztiei lore sorta bana eman zaie, eta bukatzeko, erretiratuen egoitza kanpoan jarri duten horma-irudia bistaratu dute. Muralean, XX. mendean, Villabonako industria sektorean lan egin zuten langileak ikusi daitezke.
