Arijak onartu duenez, «kezkagarria» da Komizarren gertatzen ari dena. «Aspaldidanik gertatzen ari den egoera» dela esan du, eta udal gobernuari eskatu dio neurri murriztaileak har ditzala horiek saihesteko. Izan ere, «ziur» dago EH Bilduk osatzen duen udal gobernuari eskuetatik joaten ari zaiola egoera.
«Villabonako herritar gehienen portaera eredugarria da, elkarbizitza-arauak betetzen eta errespetatzen baitituzte, eta gutxi batzuk dira jokabide arbuiagarria dutenak», nabarmendu du.
«Argi dago ingurunea zaintzeko neurrien falta dagoela, eta, horren ondorioz, Komizar parke naturala zaborrontzi bihurtu dela». Are gehiago, gertakariak «bandalismoa» baino ez direla esan du Arijak. Hori dela eta, «zorrotz zaintzea» eskatu du, poliziaren presentzia handiagoarekin, baita bideozaintzako kamerekin ere, eta Eusko Jaurlaritzako Herrizaingo Sailarekin bilera bat eskatzeko, Ertzaintzarekin koordinazioa egon dadin aisialdirako gune hori ere patruilatu dezan. Aitortu duenez, Komizar parke naturala espazio irekia da, burdin hesirik eta sarbide-aterik gabea, eta, beraz, ixtea ezinezkoa da.
Azkenik, asteburuetako eta jaiegunetako gauetan kalean alkoholdun edariak kontsumitzen dituzten pertsonen jarrerak «gizalegearen kontrakotzat eta arduragabetzat» jo ditu. «Pandemia izan aurretik ere debekatuta zegoen». Hori dela eta, «erantzukizunez jokatzeko deia» egin du Arijak.