Salbadora erretiratuen etxeko tabernak ateak zabaldu ditu berriro. Amasa-Villabonako Udalak tabernaren kudeaketa lehiaketara atera ondoren, Eddy Zelayak ustiatuko du zerbitzua asteartetik igandera, 09:00etatik 23:00etarako ordutegian. Astelehenetan taberna itxita egongo da.
Eguneko menua, plater konbinatuak, ogitartekoak eta pintxoak eskainiko dituzte, besteak beste, eta erretirodunek prezio berezia izango dute. Dena den, adin tarte guztietako bezeroak erakartzeko asmoz jarri dute martxan taberna. Kanpoaldean terraza bat ere egokitu dute, zerbitzua bertan ere eskaini ahal izateko.
Asteazkenean egin zuten irekiera ekitaldia.