EAErako hezkuntza legea berria izango du hizpide Ikastolen Elkarteko zuzendari Jose Luis Sukiak Villabonan datorren ostegunean, urtarrilaren 13an, emango duen hitzaldian. Subijana etxean izango da, 18:30etik aurrera.
Gaur egun indarrean dagoen hezkuntza legea agorturik dagoela adostasun zabala dago hezkuntza eragile, sindikatu eta alderdi politikoen artean, eta hainbat dira euskal gizarteak eta hezkuntzak dituen erronkei erantzuteko gizarte eragile ugarik mahaigaineratu dituzten proposamenak. Ikastolek ere badute proposamena, eta hezkuntza sistema adosteko momentu historiko honetan Bihar endekalogoan jaso dituzte hezkuntza sistema propio batek bildu beharko lituzkeen oinarriak. Zubimusu Ikastola da proposamen horren bultzatzaileetako bat, eta hala, Bihar endekalogoan jasotzen diren oinarriak herritarrei aurkezteko Sukia gonbidatu du Villabonara.
Bihar: Hezkuntza sistema propiorako oinarrien endekalogoa hitzaldia egungo osasun egoerak eskatzen dituen segurtasun eta prebentzio neurriak jarraituz egingo da, eta bertaratu ahal izateko aurrez izena eman beharko da, zubimusu@ikastola.eus helbidera mezu bat bidalita edo 943 692321 telefono zenbakira deituta.