Aizkardi mendi elkarteak XIII. Argazki Rallya antolatu du. Azaroaren 14an egingo dute hitzordua eta parte hartzaileek izena Aizkardiren aretoan egin beharko dute, Larrea auzoko 18. zenbakian, dohainik. 09:00etan jarri dute abiatzeko ordua eta antolakuntzak zehaztutako ibilbidean zehar ateratako argazkiak sartuko dira lehian. Lau orduko epean egin beharko da 9 kilometroko luzera duen ibilbidea.
Argazki onenak 150 euro eramango ditu, bigarren saria eskuratzen duenak 100 euro eta hirugarrenak 75 euro. Haurren kategorian berriz, 12 urtez azpikoetan, bi argazki onenen egileentzat mendi materiala izango da opari. Gainera, publikoak hautatutako argazki onenaren egileak bi lagunentzako afaria irabaziko du Iturrigoxo jatetxean, Amasan.
Argazki rallyan parte hartzen duten lanekin Aizkardik erakusketa antolatuko du Gurea zinema aretoan azaroaren 22tik 26ra, 37. Mendi Astearen egitarauaren barruan.