Amasa-Villabonako Udalak erakunde adierazpena onartu du Kolonbiako eta Palestinako herriei elkartasuna adieraziz. EH Bilduk aurkeztu du testua eztabaidarako maiatzeko osoko bilkuran, «bi herrialdeetan gertatzen ari diren giza eskubideen urraketa larriak salatu eta elkartasuna adierazteko». Udalbatzak aho batez onartu du erakunde adierazpena.
Bi herriei elkartasuna
Joan den apirilaren 28an Kolonbiako herria kalera atera zen bizi baldintza justuak eskatzeko eta Ivan Duqueren gobernuaren zerga erreformaren aurka protesta egiteko. Ordutik, mugarik gabeko geldialdi nazionalean daude, eta udalak onartutako testuaren arabera, «poliziaren indarkeria, eraildako eta zauritutako pertsonak, atxiloketa arbitrarioak eta eraso sexualak gertatu dira indar polizialen aldetik».
Guzti hori ikusita, Amasa-Villabonako Udalak legez protesta egiten dutenen aurkako errepresio «basati eta bidegabea» salatu du eta Ivan Duqueren gobernuari eskatu dio Kolonbiako herritar guztien giza eskubideak babesteko eta bermatzeko. Indar publikoek eragindako indarkeria gertakariak argitzea ere eskatu du udalak eta nazioarteko komunitateari dei egin dio ekintza diplomatiko eta politikoak aurrera eraman ditzan, «errepresioa amaitzeko eta Kolonbiako herriaren eskubideak errespetatzeko». Udal ordezkariek emandako datuen arabera, 50 hildako eta 1.700 lagunetik gora zauritu dira asteotako protestetan.
Bide batez, mobilizazioetatik kanpoko taldeek indarkeria egoera hau ondasun komunak arpilatzeko eta erasotzeko erabili izana arbuiatu du Amasa-Villabonako Udalak, eta aldi berean, ekintza horiek protesta soziala kriminalizatzeko erabili izana ere gaitzetsi du. Horregatik Kolonbiako herritarrei elkartasuna adierazi eta justizia soziala eta bizi baldintzak hobetzeko eskaerekin bat egiten duela adierazi du.
Bestalde, Israelek Palestinako herriari eragiten dizkion giza eskubideen urraketak ere salatu nahi izan dituzte Amasa-Villabonako udal ordezkariek. «Dei egiten diogu nazioarteko komunitateari erasoaldi militar hori geldiarazteko eta elkarrizketarako eta negoziaziorako bideei berriro ekin diezaion». Mahmud Abbas Palestinako presidenteak Europako erakundeen laguntzarekin Nazioarteko Bake Konferentzia bat egiteko eskaera babestu du udalak.
Palestinako herriaren giza eskubideen defentsarekiko konpromisoa agertzearekin batera Amasa-Villabonako Udalak hara bidaltzen den giza-laguntza indartzeko eskaera egin die Araba, Bizkai eta Gipuzkoako foru aldundiei, Eusko Jaurlaritzari, Nafarroako gobernuari eta Ipar Euskal Herriko elkargoari.
Elkarte gastronomikoen eskaerarekin bat
Amasa-Villabonako udalbatzak bat egin du herriko elkarteen eskakizunekin eta onartutako adierazpen batean proposamena kontuan hartzeko eskatu die eskumena duten erakundeei. «Ahalik eta lasterren osatu dezatela EAEko elkarte gastronomikoek nahitaez bete beharreko COVID-19aren aurkako protokolo espezifikoa, elkarteak berme osoz ireki ahal izan dezaten». Udalak onartutako adierazpena Lehendakaritzara, Osasun sailera eta Labi batzorde teknikoari bidaliko du.