Amasa-Villabonako Elkartasun Sareak, udaleko Gizarte Zerbitzuekin elkarlanean, oinarrizko produktuen bigarren bilketa abiarazi du. Egoera ekonomiko larria bizi dutenentzat oinarrizko produktuak biltzea da elkartasun ekimenaren helburua.
Atzo hasi zuten bilketa eta larunbata arte luzatuko da. Herritarrek Amasa-Villabonako hainbat saltokitan jarritako kutxetan utzi ditzakete produktuak, eta larunbatean bertan Eroski eta BM supermerkatu atarietan egongo dira ere.
Kanpainaren helburua oinarrizko produktuak biltzea da. Batetik, elikagaiak jasoko dituzte, hala nola, olioa, lekaleak, kontserbak, pasta eta arroza, esnea edota gailetak. Bestetik, xanpua, bainurako gela, pixoihalak, konpresak, detergentea edota lixiba bezalako garbiketarako produktuak bilduko dituzte. Eta azkenik, eskolarako materiala uzteko aukera dago; arkatzak, boligrafoak, koadernoak, pinturak, borragomak, zorrozkailuak eta abar.
Amasa-Villabonako Elkartasun Sarea egoera ekonomiko larria bizi dutenak eta bazterketa arriskuan dauden herritarrak laguntzeko elkartasun dinamika herritarra da eta bertan parte hartzeko aukera dago, horretarako 627 364 521 telefono zenbakira deitu daiteke.