Ertzaintzak emandako datuen arabera, 04:20ak inguruan jaso dute abisua. Villabonako Larrea auzoan hiru edukiontzi sutan zeuden eta suhiltzaileak ere bertaratu dira. Suaren ondorioz, inguruan zeuden hiru autok ere kalteak izan dituzte. Oraindik ez dakite nola piztu den sutea eta ikertzen jarraitzen dutela esan dute.
Villabonako Udalak esan du, Ertzaintzaren ustez sutea eragindakoa izan dela, izan ere, beranduago Zizurkilen ere beste edukiontzi batzuk erre baitira, baina gertakaria ikertzen ari direla oraindik. Udalak "gogor" salatu nahi izan du gertakaria eta elkartasuna adierazi die beren autoa kaltetua suertatu zaien herritarrei. "Era berean, sutearen berri eman duten bizilagunei eskerrak eman nahi dizkiegu. Amaitzeko, gure begirunea helarazi nahi diegu sute honek loa eta atsedena galarazi dien Larreako eta inguruko bizilagunei", gaineratu du.