Lurgatz talde feministak urtea bete du eta Villabonako Emakumeen Lehen Topaketa antolatu dute jatorri ezberdinetako emakume guztiak elkartu eta elkar gehiago ezagutu asmoz.
Berdura plazan 11:30etik aurrera ekin diote topaketari eta, eguerdira bitartean, tailerrak egin dituzte. Besteak beste, zapien hainbat erabilera ezagutzeko aukera izan dute. Eguerdian, jatorri ezberdinetako jakiak dastatzen aritu dira, hala nola, Mendebaldeko Sahara, Nigeria, Senegal, Maroko eta Mexikoko janari tipikoak.
Horren ostean, Aljibera aldatu da festa. Munduko hainbat musika entzunez, dantzaldi pribatua egin baitute. Festarekin jarraitu nahi duenak aukera izango du, iluntzean, Lurgatzek Beertoki elkartearekin elkarlanean antolatu dituen kontzertu eta afari-hitzaldian.