Kale-hezitzaileen lokalean egin beharreko berrikuntzak direla eta, udalak diru laguntza eskatu zion Gipuzkoako Foru Aldundiari bertako leihoak konpondu eta egoitza zaharberritzeko. 14.499 euroko aurrekontuari 10.874 euroko diru kopurua eman dio aldundiak, aste honetan argitara eman duen bezala.
Modu honetara, udalak 1999. urtetik Amasa-Villabonako gazteekin duen konpromisoa berretsi du. Zerbitzu honek, gazteei euren gatazkak kudeatzen laguntzen die modu pedagogiko eta lagunkoi batean, eta horretarako, lokalak ere egoera onean egon behar du, gazteen ongizatea bermatuz.
Horrez gain, landa ingurunea dinamizatzeko diru laguntza jaso du Eusko Jaurlaritzatik, guztira 4.141 euro. Besteak beste, Amasako San Martin Elizan ospatzen diren Lau Urtaro izeneko kontzertuetarako lortu da diru kantitate hau. Amaia Zubiriak eskainiko du negu honi dagokiona, urtarrilaren 19an, 20:00etan.