Emakumezkoen lehen taldea sendotzeko apustua egin du Eibarrek. Bide horretan, esperientzia handiko lau jokalari fitxatu ditu hurrengo denboraldiari begira. Hain zuzen, Realak kontratua berritu ez dien Cristina Cornejo, Leyre Fernandez, Titay Calvo eta Itziar Gastearena fitxatu ditu.
Gastearena zortzi urtez aritu da talde txuri-urdinean. Futbol ibilbidea Tolosan hasi zuen, eta lau urtez aritu zen, 2010ean Realak fitxatu zuen arte. 25 urte baditu ere, kapitaina izatera ere iritsi zen billabonatarra. Ezustean, kontratua ez berritzea erabaki zuen Realak, eta orain armaginekin ariko da.