Ehundik gora herritar izan ziren, atzo, Amasa-Villabonako Gurea zinean EH Bilduren ekitaldian. Hurrengo hauteskundeetarako alkategai izateko proposamenak biltzen ari dira: 94 paper jaso zituzten guztira, 53 pertsonen izen-abizenekin.
Guztiekin hitz egiteko konpromisoa hartu du EH Bilduk: «Denekin jarriko gara harremanetan, hitzordua zehaztu eta hitz egingo dugu. Baina atsegin handiz egingo dugu», adierazi dute prentsa ohar bidez.
Iraila edo urrian alkategaia hautatzeko azken prozesua abiatuko du koalizioak. Hautagai ezberdinen artean bozketak egiteko aukera izan litekeela azaldu du EH Bilduk: «Prozesu parte-hartzaile, garden eta demokratikoa izango da».