Bi metroko pertsona bat biltzea da egitasmoaren helburua eta hortaz, Mendaro inguruan Amasa-Villabonako herritarrek bete beharko duten kilometroa osatzeko 500 pertsona beharko dira. Giza katean izen emateko bideen berri eman zuten asteartean Gurea aretoan egindako aurkezpenean.
16 urtetik gorako herritarrek eman ahalko dute izena bost euro ordainduta zerrenda ofizialetan. Gure Esku Dagoren webgunean edo Villabonan, apirilaren 11tik aurrera larunbatero Malkar plazan jarriko duten mahaian apuntatu ahal izango da jendea. 11:00etatik 13:00etara egongo da mahaia jarrita eta giza katearen inguruko materiala ere jarriko dute salgai.
Giza katearen egitasmoa laguntzeko moduen berri eman zuten Amasa-Villabonako Gure Esku Dagoko kideek. Larunbatero mahaian egoteko apuntatu daiteke jendea edo baita ekainaren 10eko ekimenean antolaketan laguntzeko. Martxoaren 27an 19:30ean udaletxeko balio anitzeko gelan egingo dute lehen bilera giza katea antolatzen joateko.
Bide batez, saretzaile izan nahi dutenentzat ere izango da aukera Amasa-Villabonan. Inguruko jendea giza katera batzeko konpromisoa hartuko duen jende bila dabiltza. Informazio guztia jasotzeko helbide elektroniko bat ere eman dute: gizakateaamasabillabona@gmail.com.
