Hernaniko Ertzain-etxean behin baino gehiagotan jakinarazi zuten Villabonako ostalaritzako establezimendu batean ustez droga transakzioak egiten zirela. Legez kanpoko jarduera egiaztatu ahal izateko abian jarritako zaintza eta kontrol dispositiboa ostiralean amaitu zen. Arratsaldeko zazpi eta erdiak aldera, ertzainak tabernan sartu ziren, eta bi bezero ikusi zituzten bertan. Une horretan taberna barrenean dagoen biltegitik lokaleko arduraduna irten zen, eta polizia ikustean berriz biltegira itzuli eta lurrera zerbait bota ondoren argia itzali zuen.
Ertzainak biltegian sartu ziren eta lurrean substantzia marroi eta prentsatu baten tableta errektangular bat aurkitu zuten. Gainera, mahai baten gainean doitasun-balantza bat eta film gardena ikusi zituzten. Zerbitzaria identifikatu ondoren, agenteek egiaztatu zuten praka-poltsiko batean substantzia beraren beste lau zati zituela film gardenean banan-banan bilduta. Taberna miatzen Ertzaintzako Zakur Unitateak ere parte hartu zuen, eta 3.480 euro aurkitu zituzten tiradera batean zenbateko ezberdinetako billetetan.
Guztira ehun gramo haxix konfiskatu zituzten. Ebidentzia horien aurrean, atxilotu egin zuten zerbitzaria. Agenteek egiaztatu zuen bi bezeroetako batek substantzia beraren bolatxo bat zeramala, eta hori ere kendu egin zioten.
Arrastatua larunbatean eraman zuten epaitegira, behin polizia-izapideak amaitu ondoren.