Joan den abenduaren 18an ospatutako osoko bilkuran udal talde guztiek adostu bezala, egunotan oparituko diren jostailuak ez sexistak eta hezkidetzaileak izateko deia luzatu du Amasa-Villabonako Udalak.
Osoko bilkuran onartutako adierazpenak dio Eguberrietan oparitzen diren jostailuetako askok «jarrera matxista, beliko eta etikoki zalantzazkoak» dituztela eta «tamalez» askotan normaltasunez ikusten dugula horrela behar ez lukeena. Horregatik animatu nahi dituzte herritarrak egun hauetan erosiko dituzten jostailuak «ez sexistak eta hezkidetzaileak» izatera. «Gure seme-alabentzat opari politena beraien etorkizunean oraingo gizarteak dituen gaixotasuna ez izatea da», gaineratu dute.
Udalak uste du, jolasaren bitartez besteekin erlazionatzen ikasten dutela umeek eta horregatik dela «oso garrantzitsua» erabiliko dituzten jolas eta jostailuen aukeraketa, horien bitartez, «inguruarekin interakzioa izatea lortzen dutelako».
Jolas egokia aukeratzeko hainbat galdera egiteko aholkatu diete herritarrei: «Aproposa da haurraren adinerako? Zein gaitasun landuko ditu jolasaren bitartez? Zergatik eskatu du jostailu hori? Norekin jolas daiteke jostailu horrekin? Era kooperatiboan jolasteko aukera ematen dio? edota askotariko erabilerak dituen jostailua al da aukeratu duzun hori?».