Biderkatzearen gaitasuna dute sare sozialek eta, gaitasuna areagotu egiten da, erabiltzaileak maitemintzen dituzten gauzekin. Horixe gertatu zen, asteazken gauean, Maialen Lujanbiok Bertsolari Txapelketa Nagusiko lehen finalaurrekoan egindako kartzelako lanarekin: munduari bira eman die bertsoek, bai, behintzat, euskal munduari. Garaipenak hurrengo faserako zubi zuzena eraiki dio Maialen Lujanbiori, baina, zubia sendotu diote eskuratutako 750 puntuak.
Gainontzekoek hurrengo finalaurrekoetara begira geratu beharko dute, eta hain justu hirugarrengoan ariko da Beñat Iguaran amasarra. Seguran kantatu, eta Tolosako saioan hurrengo faseko langa gainditzea lortu zuen. Bihar, beraz, Seguran bezainbeste aritzera igoko da Maule-Lextarreko oholtzara, eta epaileek esan dezatela.
Saio berean ariko dira Beñat Gaztelumendi, Etxahun Lekue, Nerea Ibarzabal, Julio Soto eta Nerea Elustondo, eta 17:00etan hasiko da kanporaketa.
Badirudi Tolosaldeak ordezkaritza zabala izango duela oholtzatik kanpo ere, Beñat Iguaran animatzera bertaratuko baitira bertsozale asko; Harituzek autobusa ere antolatu du. Gainera, herri bazkaria izango da Maule-Lextarren bertan.
Hurrengo faseko parte-hartzaileen zerrenda datozen azaroaren 12an erabakiko da, Durangon. Ordura arte, saioez gozatzea baino ez da geratzen.
Irakurri hemen: Joakin Agirre Bertsolari Txapelketa Nagusiko epaileari egindako elkarrizketa.
