Jende ugari hurbildu da Villabonako errebote plazara Onddo Gazte Asanbladak egindako deiari erantzunez. "Urtero herritik eta herriarentzat antolatzen diren jaietako hainbat ekintza mehatxupean ikusi ditugu aurten. Ez gaude prest eraso hauen guztien aurrean geldirik eta isilik gelditzeko", adierazi dute.
Lehenengo eta behin, azaldu dute Villabonako Udalak ez dituela futbitoko futbol txapelketari ematen zaizkion diru laguntzak kendu, "murriztu" baizik. Ondoren, salatu dute udaletxea bera izan dela santio jaietako egitarauaren azalaren inguruko "tirabirak" sortu dituena.
Remi eta presoekiko elkartasun ekimenak egitarau ofizialetik kendu izana, herriko elkarteek atera ohi duten zapiari "boikot" egin izana eta Onddo Gazte Asanbladak gazte egunerako antolatutako ekitaldia "zentsuratu" izana leporatu die Villabonako Udal Gobernuari.
