Remi Gogoan ekimeneko kideek hartu dute hitza lehenengo, eta Remi Ayestaranen heriotzatik zortzi urte pasa badira ere, aitortza eskatzen jarraitzen dutela adierazi dute. "Remi Ayestaranen familia, lagun eta ingurukoei ez zaigu oraindik eragin zitzaigun mina aitortu. Remi bortizkeria politikoaren biktima eizan zela aitortzea nahi dugu, eskatzen dugu. Gertatu zena argitzea ezinbestekoa da, Remi ez zelako bihotzekoak jota berez hil".
Remi Ayestaranen omenaldia egitarau ofizialetik kanpo utzi zuen Villabonako Udal Gobernuak. Horri erantzunez, Onddo Gazte Asanbladak bere egitarauan sartu zuen eta beraiek ere parte hartu dute omenaldian. Remik Onddo Gazte Asanbladako kide zela egindako lana txalotu dute, eta ondoren, aurtengo Hatortxu rock jaialdiko oroigarri bat utzi dute bere oroigarrian: "Badakigu Remik oso gogoko zuela horrelako ekimenetan parte hartzea; horregatik, hemen ekartzen dizugu aurtengo oroigarri bat, hatortxu honetan ere presente izan baitzara".
Mikel Ayestaran Remi Ayestaranen anaiak ere hitz egin du; lehenengo eta behin, espetxean hil den Kepa Del Hoyo preso galdakoztarraren familiari besarkada bana bidali die: "Denok dakigu zein presiopean daude kartzelan. Espetxeak lehertu du Kepa, duela zortzi urte Remirena lehertu zen moduan. Ondoren, Villabonako Udal gobernuaren jarrera salatu du: "Zortzi urte pasa badira ere, ez dugu aitortzarik".
Emanaldian, Oinkari Dantza Taldeko hainbat kidek dantza egin dute, eta Oihana Iguaran eta Iñaki Lizasok ere abesti bat eskaini dute.
Hemen ekitaldiaren laburpena:
