EHUko Mikel Laboa Katedrak eta Mintzola Ahozko Lantegiak bi ikerketa proiektu sari esleituko dituzte, geroko tesiak bultzatzeko helburuarekin eta ikertzaile gazteei edota hasiberriei bultzada emateko asmoz. Ikergai nagusia bertsolaritza duten proiektuak gauzatzeko banatuko dituzte 2.000 euroko bi diru laguntza. Edozein jakintza alorretik aztertu ahal izango dute ikerlariek bertsolaritza.
Bestalde, master amaierako lanen proiektuak lehenetsiko dituzte, baina beste ikerketa lan monografiko batzuen proiektuak ere onartuko dira. Edozein modutara, unibertsitateko irakasle-doktore baten bermea beharko du proiektuak.
Eskaerak aurkezteko informazioa Mintzola eta Mikel Laboa katedrako webguneetan izango dute interesatuek eta eskaerak aurkezteko azken eguna urriaren 15a izango da. Handik hilabetera argitaratuko da ebazpena.
Bertsolaritza ikergai
Mintzola Ahozko Lantegiak, EHUko Mikel Laboa katedrak eta Euskara eta Ikerkuntza errektoreordetzak 2013an abiatu zuten bertsolaritzari loturiko ikerketak egiteko bidea eta ordudanik areagotu egin dira gai honekin lotutako azterketa lanak. Proiektu saria lortutakoek tesirako proiektuak ere aurkeztu dituzte gerora.
Oihana Iguarani esleitu zioten iaz ikerketa proiektu hauetako bat, agenda settingak bertsolaritzaren diskurtsoan duen eragina ikertzeko. Amasarrarenarekin batera, abian dauden ikerketa horietako zenbait ezagutzeko aukera izango da EHUko Uda ikastaroetan, abuztuaren 24an eta 25ean, Donostiako Miramar Jauregian. Oraindik ere izen emateko aukera dago Bertsolaritzaren kantaera eta sormena ikastaroan.