Bien bitartean edukiontzi berriak jartzen ari dira herriko 17 puntutan. Amasa-Villabonako EH Bilduk kritikatu duenez, otsailean udaleko hiru alderdiek adostu zuten «elkarlan eta adostasunaren» bidez ezarriko zutela sistema berria, eta ez dira horrela egiten ari: «Udal gobernuak jarraitutako prozedura da kritikatzen duguna. Ingurumen batzordean erabaki behar genuen sistema aldaketa noiz eta nola egin».
Koalizio abertzaleak salatu du urtarriletik ez dela batzorderik deitu: «Errespetu falta iruditzen zaigu EAJk informazio hori komunikabideei lehenago jakinaraztea udaleko organoetan baino». Udal gobernuak «gauzak hobeto» egin zitzakeela uste du EH Bilduk. Hala ere, mezu argia zabaldu du: «Jarrai dezagun etxeko hondakinak ondo bereizten eta ez dezagun atzera egin birziklatze tasan. Hori izango da erraustegirik ez dugula behar frogatzeko modurik egokiena».