Hainbat herritarrek haserrea adierazi zuten atzo iluntzean, Malkar plazan egindako batzarrean, Amasa-Villabonako udalak plaza horretan bertan pintatuta zegoen euskal presoen Euskal Herriratzea eskatzeko ikurra ezabatzea erabaki ondoren."Baina haserrearen gainetik, presoen eskubideen defentsan jarraituko dugu eta defentsa hori azken muturreraino eramango dugu", esan du Amasa-Villabonako Sortuk. Krispazioa eta samina eragitea egotzi diote Villabonako EAJri eta, alderantziz, Sorturen gogoa, "herri honi proiektu sendo bat" eskaintzea dela esan dute.
Gehiengo sozial eta politiko zabal batek bere egiten duen ikurra erakusteko deia luzatu dute Amasa-Villabonako Sortutik, "gure herria beti izan delako presoekin solidarioa eta halaxe izaten jarraituko du aurrerantzean". Herriko kale, etxe, taberna eta saltokietan euskal presoak Euskal Herriratzeko ikurra zintzilikatzera animatu dituzte herritarrak eta astelehenean, apirilak 18, Malkar plazan egingo den batzarrera azaltzeko eskatu diete.
Beste deialdi batzuk
Amasa-Villabonako Sortuk datozen orduetan izango diren beste hitzordu batzuk gogoratu ditu. Nekane Txapartegiren atxiloketa salatzeko elkarretaratzea egingo da bihar ostirala, apirilak 15, Asteasuko plazan, 20:00etan.
Bestalde, igandean, Amnistiaren norabidean, preso eta errefuxiatua etxera goiburuarekin Bilbon ospatuko den manifestazioan parte hartzeko gonbidapena luzatu du. Hitzordu horretara joateko deia egin dute Amasa-Villabonako 17 preso eta iheslari ohik. Eguerdiko 12:00etan aterako da La Casillatik.