Oilaskoa erosteko garaian, harakinari zati ertainetan zatitzeko eskatuko diogu, gisatu erara prestatzeko aproposa baita honako mozketa.
Behin oilasko zatiak prest ditugula, gatzatu eta piper hautsa gehituko diogu eta jarraian irinetik pasako dugu. Oilaskoa astinduko dugu, soberan duen irina kentzeko -bestela, zuzenean mitxelinetara joango zaigu eta-.
Kazola batean garbitu eta zatituta ditugun baratxuriak bota eta frijitzen jarriko ditugu. Kolore pixka bat hartzen duenean, sutik aterako dugu. Jarraian kazola horretan oilaskoa sartuko dugu. Oilaskoa frijituko dugu, urre kolorea eman arte. Eta jarraian, sutik ateratako baratxuri horiek sardexka baten laguntzarekin zapaldu eta pure antzeko bat egingo dugu eurekin.
Ondoren, berriro ere kazolan botako ditugu. Momentu honetan, ardo zuria gehituko diogu, alkohola joan arte apurtxo bat itxarongo dugu -minutu baten kontua izan daiteke-. Eta jarraian, salda gehituko diogu. Tapa baten laguntzaz, kazola estaliko dugu eta 20-25 minututan prest izango dugu -baserriko oilaskoa bada, denbora gehiago behar izango dugu-.
OSAGARRIAK
OILASKOA BARATXURI ERARA
Oilaskoa.
Baratxuria (buru bat).
Ardo txuria.
Oilasko salda (Izan ezean, ura erabili daiteke).
Olioa.
Gatza.
Piper hautsa.
Irina.
