"Iratzar defenda dezagun" lelopean mobilizazio asteburua

Tolosaldeko Ataria 2015ko eka. 23a, 10:36

Datorren asteburuan mobilizazioak egingo dituzte zigortu dituzten herriko tabernen herri eta auzoetan. Villabonan "Iratzar defenda dezagun" lelopean egingo dira ekitaldiak.

Larunbatean, 20:00etan elkarretaratzea egingo da Berdura plazan eta jarraian afari-merienda Iratzar kanpoan.

Datorren astebururako jarri dute hitzordua Villabonan eta mobilizazioak antolatuko dituzte zigortutako taberna edo elkarteren bat dagoen auzo eta herrietan. Mobilizazioekin «lapurreta» salatu eta auzitegien erabakia Espainiako Estatuaren «ezintasunaren ikur» bilakarazi nahi dute.

Ostegunean berretsi zuen Auzitegi Gorenak herriko tabernak konfiskatzeko erabakia, eta urtebete eta hiru hilabete eta urtebete eta hamar hilabete arteko kartzela zigorra ezarri zien hogei laguni, kargu publikoetarako inhabilitazioarekin batera. 101 herriko taberna eta elkarte itxi eta konfiskatzeak ekarriko lituzkeen ondorioak ekarri dituzte gogora; hasteko, horietan diharduten dozenaka langileren egoera. Baita, oro har, herritarrentzat ekarriko lukeena ere, «milaka herritarren ahalegin, lan eta ekarpen ekonomikoak» ahalbidetu duelako elkarte horiek egotea, haien ordezkariaren hitzetan.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!