'Cruces y corazones' erakusketa ikusi daiteke Villabonako Gurea erakusketa gelan. Sinbolismoz betetako lanak ikusi daitezke bertan, eta billabonatar batenak gainera; Juan Ramon Balerdirenak. Atzo iluntzean izan zen inaugurazioa eta ekitaldi xume zein hunkigarria izan zen. Lanak pinturak eta eskultura txikiak dira, izan ere Balerdik horixe lantzen du batez ere. Lan koloretsuak dira, esanahi handikoak, ikuslea pentsatzera, hausnartzera, gonbidatzen du lan bakoitzak. Gurutze asko ikusi daitezke, behin eta berriz errepikatzen den ikurra da. Lanetariko gehienak erakusketa honetarako prestatu ditu bereziki, baina badira aurreko lanak ere. Lanetariko bat Villabonako Udalari eskaini dio eta beste bat Vicente Ameztoy billabonatar sortzaileari. Ameztoyren lana maite baitu Balerdik.
Atzoko aurkezpenean sistemaren kontra egindako lanak direla esan zuen sortzaileak; "sistema honen kontrako oihua da nire obra, sistema hau ez baitzait gustatzen". "Entzun egiten dut, hitz egiten didate, pairatzen dut... eta hortik ateratzen da adierazi nahi dudana", gaineratu zuen. "Momentu batean margotzen jarraitzeak merezi ote zuen edo utzi egin behar nuen galdetu nion nire buruari, eta momentu horretan zerbait idatzi nuen, hauxe: Y de la mitad de la ignorancia, a mi alma pregunté, ¿por qué el deber y la dedicación a la creación, por riquezas o por adulación?,y ella me respondió, os ofrezco mi pensamiento, mi tristeza, mi desnudez, la renuncia, la resistencia, y un corazón verde. Porque sin vosotros mi obra no tendría ni inspiración, ni función ninguna. Espero que mis obras os conmuevan, y en esa emoción penséis, porque ese pensamiento será vuestro, y sólo el olvido os lo arrebatará".
Nora Urbizu Arozena Euskara eta Kultura zinegotziak bere aldetik, Villabonan herriko sortzaileei beraien lana erakustekoa aukera emateko helburua duela udalak, "eta ezusteko bat baino gehiago izan ditugu, erakusketa hau ikustea besterik ez dago". "Obra ikusita Vicente Ameztoy etorriko zaizue gogora, eta ez da kasualitatea, lagun handiak izateaz gain, jak¡n badakigulako Balerdi Ameztoyren jarraitzaile eta miresle sutsua dela", esan du. "Niretzako plazer bat da Ameztoy gogora ekartzea berriz ere", gaineratu zuen.
'Cruces y corazones' erakusketa martxoaren 6a arte ikusi daiteke Gurea erakusketa gelan, astelehenetik ostiralera 18:00etatik 20:30era, eta larunbatetan 10:30etik 13:00etara.