Nora Urbizu udal ordezkariaren esanetan, aldarrikapen zeinu moduan antolatu dute lehia: «Sahararrentzat 2015. urtea oso esanguratsua izango da. Urrats berriak emateko beharra ikusten dute gazteenek, eta hori urte berrian izan daiteke, bertan pairatzen duten egoera ez baldin bada aldatzen».
Villabonatik elkartasuna agertu nahi diete sahararrei, eta horregatik antolatu dute larunbateko partida. Etxeko taldean erregional mailako jokalariak ariko dira. Saharako taldea bertako herritarrekin osatu dute, eta Euskal Herritik kanpo bizi diren sahararrak ere Arratzainen izango dira larunbatean. Jadanik, hasi dira entrenamenduekin.