Atzo eguerdian omenaldia egin zioten Iñaki Epelderi Altzon, herriarekin lotura estua izan zuen margolariari aitortza eginez. Ekitaldiaren ardatza Altzoko Ostatuko ekialdeko horman margotutako horma-irudi koloretsua izan zen, Eider Epeldek eta Arkaitz Urangak sortua, artistaren lan eta estiloan oinarrituta.
Xabier Olano alkateak azaldu bezala, ekimenaren helburua Epelderen ibilbidea eta herriarekin izan zuen harremana aitortzea izan zen. Inaugurazioan giro hunkigarria nagusitu zen, eta bertan izan ziren artistaren senideak —seme-alabak eta anaia—, lagunak eta herritarrak, guztiek batera omenaldiarekin bat eginez.