Gipuzkoako Errotaren Eguna ari dira ospatzen, hirugarrengoz, Altzon. Herriko plazan egin dute hitzordua eta Altzo Azpira jaitsi dira oinez denak batera. Hain zuzen, Altzon Azpin dago kokatuta San Salvador Bekoa errota eta hori bisitatu dute, Antton Iztueta herritarrak gidatuta.
Errotaren historia entzuteaz gain, martxan ikusteko aukera ere izan dute. Horrez gain, minak eragindako kalteak berreskuratzeko lanak ere ikusi dituzte, eta ondoren, hamaiketako egin dute elizako aterpean.
Errotatxiki
Herri askotan Jaun-Andere Handien menpeko izaten ziren errotak, eta Altzo Azpin ere Olazabalgo Jaun-Andereari lotuak agertzen dira. San Salvador Bekoa errota ez ezik, Altzon, bazegoen Konderrota izeneko bigarren errota bat.
XV. mendetik aurrera errota egokia edukitzea izan zen altzotarren kezka nagusienetakoa. Dokumentu zaharretan ikus daitekeenez, hitzarmen eta aldarrikapen ugari izan ziren mendeetan zehar Olazabal Etxea eta altzotarren artean.
Bi errotarri dituen errota da Errotatxiki. 1967an utzi zion labore-aleak ehotzeari. Ia 40 urtez geldi egon ostean, Altzoko Udalak erosi zuen 2005eko otsailean eta zaharberritzeari ekin zion. Geroztik, noizean behin gainarria pikatu egin behar izaten dute, eta horretarako, peskantea deritzon tramankulua erabiltzen da errota gehienetan. Altzon, ordea, sabaian aurkitzen den zurezko dornu birakari batez altxatzen dute gainarria. Eta hori da, hain zuzen, San Salvador Bekoa errotaren berezitasuna.
