Azoka Eguna da Altzon. Goizean goizetik eta euriari desafioka, Altzo bertako eta inguruko baserritar eta artisauek euren postuak jarri dituzte herriko plazan. 43 postu izan dira guztira eta presente izan dira Altzoko erraldoiaren inguruko liburuak baita Aralar institutuko DBH 4. mailako herriko ikasleek jarri duten postua ere. Taloak, txorizoa eta mondejuak dastatzeko aukera izan da goiz osoan zehar.
Tolosalde inguruko ekoizle eta artisauak izan dira protagonista nagusi, nahiz eta Bizkaia eta Nafarroatik ere gerturatu den baten bat. VI. Azoka Eguna izan da gaurkoa Altzon. 2020ko etenaren ondoren iaz berreskuratu zuten eta jende asko gerturatu da gaur goizean ere.
Azoka Eguna Olentzerotan Jakin-minez egitarauaren barruko ekitaldia da. Bihartik aurrera ekitaldi gehiago izango dira Altzon.