Altzoko herritarrak, eta batez ere, Manuel Antonio Imazen oinordekoak, oso haserre daude une honetan. Egurgile batek, Imazen Pagoa zuhaitz historikoa dagoen inguruko basoan lanean ari zela, pagoaren adar bat bota du. Pilar Zuriarrainek, Imazen oinordekoak, "ezbehar oso larria" dela esan du: "Jipoi handia izan da, dena txikitu baitu. Bai senideak, baita herritarrak ere, oso haserre gaude gertatutakoagatik".
Zuhaitza berezi izendatuta dago, eta 2017ko Europako Zuhaitza Sarian parte hartu zuen. Hori dela eta, bi eskari egingo dituztela azaldu du Zuriarrainek: "Batetik, Gipuzkoako Foru Aldundiari dagokion ardura eta zaintza eskatuko dizkiogu, eta aztertu eta ikertu dezatela benetan zer gertatu den. Ea guztia konpondu dezaketen. Bestetik, egurgileari kalte-ordainak exijituko dizkiogu".
Bere garaian bizi izan zen Manuel Antonio Imaz bertsolariak landatu zuen pagoa izango da herriko natur ondare ezagunena eta maitatuenetakoa. "Familiaren zuhaitza ez ezik, herritarren zuhaitza ere bada", nabarmendu du Zuriarrainek. Ostegunean 186 urte beteko dira landatu zuela. Bai berak, baita oinordekoek ere ondo zaindu dute orain arte, eta egun familiaren sinboloa da. Orain, ordea, zaila izango da jasandako zauriaren orbaina ahaztea.
