Epaian kondenatuei eta beren familiei "elkartasunik zintzoena" helarazi die udalbatzak, uste baitu epaia "neurrigabea" dela. Epaia ematerako unean desobedientzia zibila sedizio bihurtzeko auzitegiak erabili dituen argudioek herritarren oinarrizko eskubide demokratikoak eta zibilak arriskutan jartzen dituztela uste dute Alkizako udal ordezkariek.
Horregatik, Kataluniako auziaren konponbidea soil-soilik politikoa dela azpimarratu dute eta ez judiziala. "Auzi politikoak bideratzeko legeak ez du kortse aldaezina izan behar. Elkarrizketa zintzoa eta herritarrei erabakitzeko eskubidea ematea da horrelako auzia biratzeko modurik eraginkorrenak, Quebec-eko eta Eskoziako adibideak lekuko".
Tasak eta prezio publikoak
2020 urterako udal tributuak, tasak eta prezio publikoak onartu ditu Alkizako Udalak. Onartutako aldaketarik nabarmenena izan da eguzki-plakak jartzeagatik emaniko hobariaren iraupena mugatzea, instalazioa egin eta lehen 10 urtetan bakarrik aplikagarria izango da hobaria.