Ostiral arratsaldean inauguratu dute espazio berria eta herriko artisten obrak daude ikusgai zein salgai. Hainbat funtzio beteko ditu tokiak, besteak beste, bisita gidatuentzako abiapuntua izango da eta, hilean behin, bertan kultur ekintzak antolatzeko asmoa dutela adierazi du Ayusok.
Astelehenetik ostiralera bitarte egongo da zabalik Alkizako Kabia, goizeko bederatzietatik hamabietara; eta arratsaldeko lauretatik seietara. Lantzean behin, asteburuetan ere irekiko dutela eta aurrez eskaera egin ezkero ere zabalduko dutela azaldu du teknikariak.
Komikigintza lantegia
Inaugurazioarekin batera, herriko haurrei bideratutako komikigintza tailerra ere eman du Iñaki Martiarena Mattin ilustratzaileak. Belardo pertsonaiaren sortzailea da Martiarena eta pertsonaiak 20 urte bete dituela eta, komikia argitaratu du.
Ordubete iraun duen saioan, umeek komikiak egiteko lehen pausoak ikasi dituzte, eta amaieran, komiki bana sinatuta oparitu die ilustratzaileak.