Begoña Durruty ilustratzailearen lanak ikusi ahal izango dira Ur mara museoan, igandean, abuztuak 18, 11:30etik aurrera. Durrutyk 2017an Txalaparta argitaletxean Bereterretxen kanthoria liburua plazaratu zuen, izen bereko baladan oinarrituta. Zuberoako herriak belaunaldiz belaunaldi gaur egun arte kantatu du. Liburuan bildutako ilustrazioak izango dira ikusgai Alkizan.
Bide batez, Ortzian abesbatzak Juan Kruz Igerabideren olerkietan oinarritutako emanaldia eskainiko du igandean. Besteak beste, Ana Elortzak, Miren Jauregik, Amaia Zapirainek, Euken Ostolazak, Jose Luis Toledanok eta Bego Bastarrikak osatzen dute taldea. Poeta adunarra ere bertan izango da.
Goiza borobiltzeko bazkaria egingo da eta begetarianoentzako menua ere egongo da bertan. Hamabi eurotan eman daiteke izena 609 46 59 42 telefonora deituta.