Apirilaren 23a da Liburuaren Nazioarteko Eguna, eta Alegiako Liburutegiak hainbat jarduera antolatu ditu data horren inguruan. Ospatzen aurretik hasiko dira eta, guztira, bi egitasmo prestatu dituzte.
Hain zuzen, batetik, hilaren 20tik 23ra egiteko erronka bat antolatu dute: herrian zehar egiteko jolas bat prestatu dute, eta parte hartzaileek liburu bakoitza dagokion idazlearekin lotu eta emaitza liburutegian entregatu beharko dute. Antolatzaileek aurreratu dute «sorpresatxo bat» izango dutela parte hartzen duten guztiek.
Eta, bestetik, erakusketa bat ere prestatu dute. Liburuaren Nazioarteko Egunari buruzkoa izango da erakusketa, eta liburutegian ikusgai egongo da apirilaren 20tik 24ra. Alegiako Udaletik herritarrak aipatutako jardueretan parte hartzera gonbidatu dituzte.