Alegiako Intxurre Elkarteak iaz erabaki zuen Inaxio Begiristain Kultur Beka sortzea. Lehen deialdia egin dute jada eta Alegiako Herri Antzerki Proiektuak jaso du, 2024an bere ekimenak gauzatu ditzan. Proiektuaren helburu nagusia Alegian euskal antzerkiaren zaletasuna piztea eta horri eustea dela nabarmendu du Intxurre elkarteak, baita «euskarazko ekimen baten bueltan herritarrak batzea» ere. Era berean, Inaxio Begiristainen figura oroitzea eta transmititzea, belaunaldiak lotuz antzerki taldearen jarraipena lortzea eta urtero obra bat eskaintzea dituzte helburu, eta hain justu horregatik jaso dute beka.
Azken puntu horri lotuta ari dira obra berri bat prestatzen, Jo ezak berriro Sam izenekoa. Ekainean estreinatuko dute eta herrian bertan hiru emanaldi eskainiko dituzte, eta beste herri batzuetara zabaltzeko asmoa ere badute.