Alegian joan den urteko azaroan jarri zituen martxan Renfek tren geltokiko pasabideetara sartzeko arrapalen irisgarritasuna hobetzeko lanak. Helburua aipatutako arrapala horiek irisgarritasun araudira egokitzea izan da, eta horretarako 115.932,42 euroko inbertsioa egin du Renfek.
Hilabete honen hasieran bukatu zituzten lanak Alegiako trenen geralekuan, eta herriko Regina Sorarrain alkatearen hitzetan «harreman oso ona» izan dute «uneoro» Renferekin: «Haiekin izan dugun komunikazioa oso ona izan da hasiera-hasieratik, eta horrelaxe mantendu da lanek iraun duten bitartean».
Hari berari tiraka Alegiako alkateak gaineratu du «gertutasun handia» sentitu duela Renfeko langileekin, eta azaldu du «frogatu diotela» herritik egindako iradokizunak «kontuan hartu» dituztela lanak egiteko garaian.
