Joseba Jimenez Kaxkagorri alegiarrak erakusketa jarri du Alegian. Thailandiako, Indonesiako eta berak egindako artisau lanak jarri ditu ikusgai, eta erosteko aukera ere izango da. Jubilatuen atzeko lokalean egongo dira zurezko kutxak, egur lanak, jokoak, musika tresnak edota pitxiak abenduaren 24ra bitarte, abenduaren 29tik 31ra eta urtarrilaren 3tik 5era, 17:00etatik 21:00etara.
Jimenezek 26 urterekin, mundua ezagutzeko eta bidaiatzeko grinak bultzatuta Alegia utzi zuen eta hainbat lurraldetan izan ostean, Thailandian finkatu zen, zehazki, Koh Tao irlan. «Bakea eta lasaitasuna» topatu duela bertan azaldu du, baina, hori bai, etxearekiko eta Euskal Herriarekiko herrimina asetzeko urtero, urte bukaeran Alegiara itzuli ohi da. Bidaia bertatik ekartzen dituen artisau produktuak ikusgai eta salgai jartzeko aprobetxatu ohi du. Adierazi duenez, azken urteetan Alegian denboraldi luzeagoak ari da egiten.