Urtezahar eguna berritasunez jantzi dute aurtengoan Alegian. Krosa beraren ordutegia aldatzeaz gain, ibilbidea ere moldatu dute. Goizez ekin diote korrika saioari alegiarrek, eta eskola parean izan dute irteera eta helmuga lehenengoz.
Lehiaketa baino kirol saioa izan da gaurkoa; izan ere, Alegian ez dute sailkapenik osatzen gaurko lasterketarekin. Guztien parte hartzea izaten da garrantzitsua, festa eguna bihurtuz Urtezahar eguna.
Gaztetxoenek lasterketa amaituta, dortsala entregatu bezala, goxokiak eta napolitanak jaso dituzte hamaiketako gisa.
Laguntzeko aukera
Dortsal mahaiaren ondoan, beste mahai bat ere bazuten ikusleek. Bira bidaia-ko lagunek ezarri dute mahaitxoa. Bertan ziren salgai kamisetak eta poltsak. Hain zuzen, bertan eskuratutako diruarekin, Bira bidaian ari diren Ander Arandia alegiarrari eta Garbi Arroyuelo bilbotarrari, tandemean Ugandara iristen lagunduko zaie.