Alegiako Udalak, osasun zentroak, Jubilatuen elkarteak, Nagusilanek eta elizak elkarlanean antolatu eta koordinaturiko ekimena da Txintxarriak Martxan. Geldialdiaren ostean, atzo eman zioten hasiera 2021-2022 denboraldiari. Adineko pertsonak ariketa fisikoa egitera bultzatzea eta elkarren arteko harremanak sendotzea helburu dituen ekimenak lehen irteera izan zuen atzokoa. Lehen irteeran 25 lagunetik gora izan ziren parte hartu zutenak.
Neurri guztiak hartuta, bueltan dela adinekoen osteguneroko hitzordua gogorarazi dute udaletik. Irteerak ostegunero 10:30ean plazatik abiatuko direla zehaztu dute.
Aldez aurretik aipatu elkarteetako kideek lagunduko diete Txintxarriak Martxan ekimenean parte hartzen duten herritarrei, eta egoera bakoitzera egokitutako ibilbideak osatuko dituzte.
Udalak eskerrak eman dizkie parte hartzen duten elkarte horiei guztiei, eta baita boluntario gisara arituko direnei.