Alegiako pilotalekua azken asteburuetan zaborrez beteta agertu da. Ez da lehen aldia, eta ateak ostikoz ireki eta barrura sartzeaz gain, asteburuan, sua piztu dute pilotaleku barruan lurra izorratuz.
"Behin eta berriz errepikatzen diren gertaera hauek gaitzetsi egiten ditugu", azpimarratu dute Alegiako Udaletik. Pandemiak nahi baino leku gehiago itxiarazi dituela adierazi dute, baina era berean, ateak irekitzeak beldurra ematen diela, "gerora begira horrelako ekintzak egiten jarraitu behar badute". Herriari onura dakarkioten kirol taldeak direla kaltetuenak esan dute, "neurri mugatzaileak beraiek pairatzen baitituzte", eta nabarmendu dute "gutxi batzuk herri oso baten kaltetan" dabiltzala. Kezkatuta agertu da udala: "Ateak ostikoz ireki, zikinak zabaldu, suak piztu,… Zer dago hauen buruetan?".
Pilotalekuko kirol instalazioak erabiltzen dituzten kirol talde ezberdinak ere kexu agertu dira, eta esan dute "oso haserre" daudela jokabide hauen aurrean.
