«Garaiak aldatu egiten dira eta guk ere garaiekin aldatu egin behar izaten dugunez, iritsi da une hori», azaldu dute Intxurretik. «Urte askoan pertsona berdinen esku egon da Intxurreko gidaritza eta hauek aldamenera pauso bat emateko beharra sentitu dute orain. Egoera horren aurrean, Intxurreko antolakuntza birplanteatzeko eta berregiteko beharrean aurkitzen gara».
Hori horrela, hurrengo urteari begira antolakuntza lan horietan parte hartu nahi lukeen jende berri bila dabiltza. Antolakuntza «talde sendo bat» osatu nahi dute «lanak guztien artean banatuz eraman errazagoa izan dadin eta erabakiak indartsuagoak izan daitezen». Aldi berean, «talde homogeneoa» izatea nahi dute, «pentsamendu eta irakurketa ezberdineko» jendea bilduz, «ikuspegi ezberdinek emango baitigute erabaki onena hartzeko informazioa». Interesatu guztien arteko bileretan azalduko dute taldearen gaur egungo egoera, erabakiko dituzte eman beharreko pausoak eta bakoitzak egin dezakeenaren eta egin nahi duenaren araberako lan banaketa egiten saiatuko dira. Parte hartu nahi lukeen edonori egiten diote deia, eta interesa dutenek intxurrekke@hotmail.com helbidera idatzi dezatela azaldu dute.