Intxurretik azaldu dutenez, azken egunetan herrialde bakoitzeko futbol federazioen eta Eusko Jaurlaritzak egindako bileretan, «pandemia garaian futbol entrenamenduak berriro ere martxan jarri ahal izateko plan berri bat egituratu da, horretarako beharrezkoa diren neurriak eta arauak zorroztuz». Besteak beste, ondorengoak dira entrenamenduetarako hartu diren neurriak: sei laguneko entrenamenduak izatea, musukoarekin entrenatu beharra, entrenamenduak egin ahal izateko herriko intzidentzia metatua 500dik beherakoa izatea...
Hori horrela, denboraldiari amaiera eman diote printzipioz, «egoeraren bilakaerak guztion segurtasuna bermatu ezean». Gizartean orokorki bizi den egoeraren moduan, «denboraldi arraroa izan da guztiontzat», diote Intxurretik: «Entrenatzaile, zuzendaritza, guraso eta batik bat talde guztietako jokalari bakoitzarentzat; ezin izan baitugu futbolaz aurreko urteetan bezala gozatu». Bestalde, Intxurre Taldea osatzen duten guztien partetik eskerrak eman dizkiete laguntza eskaini dieten guztiei, eta jakinarazi dute hasi direla hurrengo denboraldia prestatzen, «segurtasun osoz parte hartu ahal izango dugun esperantzarekin».