Alegiako Mendi Asanbladak kontsumo ohituretan aldaketa eragin nahi du, eta berrabilpena bultzatuz ekimen berria jarri du martxan. "Gaur egun gure gizartean eta gure eguneroko bizitzan hain barneraturik dauzkagun kontsumo ohituren aurrean, gure ingurunea zaintzeko aukeretako bat da berrerabilpena", azaldu dute.
Horren aurrean, Alegiako Mendi Asanbladak bigarren eskuko materialen trukea eta salmenta bultzatu nahi ditu. "Honekin berrerabilpenerako kultura gure artean sustatu eta bultzatu nahiko genuke", nabarmendu dute. Egungo egoerara moldatu, eta Whatsapp talde bat sortu nahi dute interesa duten pertsona guztien artean.
Interesatuek alegiakomendiasanblada@gmail.com helbide elektronikora idatzi beharko dute, eta TRUKEama izeneko taldeko kide izatera pasako dira. Talde hori Alegiako Mendi Asanbladako Batzordeak kudeatuko du, eta herritarrak kontsumo ohitura jasangarrien alde egitera animatu nahi dituzte.