Alegiako Udala "kezkatuta" agertu da Langaurreko atsedenlekuan agertzen ari den zabor kopuruarekin. Langaurreko hainbat erabiltzailek bertan uzten dituzte sortzen dituzten hondakinak eta hori dela eta, udalak adierazi du hainbatetan "itxura negargarria" izaten duela atsedenlekuak. Langaurren hondakinak uztea guztiz debekatuta dagoela gogorarazi eta erabiltzaileei arduraz jokatzeko deia egin die udalak: "Guztion artean zaindu beharreko eremua baita, Langaurrez gozatzen jarraitu nahi bada behintzat".
Hondakinei eta Zoru Kutsatuei buruzko 22/2011 Legeak hiru arau hauste mota bereizten dituela gogorarazi du udalak: "Arinak, larriak eta oso larriak. 900 eta 1.750.000 euro bitarteko isun ekonomikoak aurreikusten ditu lege horrek, arau hauste mailaren arabera".
Gauzak horrela, arduraz jokatzeko eta ingurumena zaintzeko deia egin, eta arazoak berdin jarraitzen badu, bestelako neurriak hartu beharko dituela jakinarazi du udalak.