Ostiralean hasi eta abenduaren 3ra bitartean luzatuko den Euskaraldiari hasiera emateko, San Juan eskolako ikasleek ekitaldi bat egin zuten ostiral goizean Alegiako udaletxean. Eskolatik udaletxerako bidea kalejiran egin zuten eta Unai Iraola alkateak egin die harrera. Euskaraldiaren hasiera iragartzeko pregoia irakurri zuten ondoren ikasleek. Pregoia irakurri ostean bi bertso abestu zituzten eta horrekin eman zitzaion amaiera ekitaldiari.
Gogoan izan, Euskaraldiarekin loturiko beste hainbat ekintza ere egingo direla datozen egunetan. Azaroaren 27an, asteartean, eskolako ikasleek herri kirolak egingo dituzte 14:15etik aurrera Elorri pilotalekuan, eta hilaren 29an, ostegunean, eta ordu berean, karaokeaz gozatzeko aukera izango dute eskolako ikasleek, kultur etxeko areto nagusian.
Abenduaren 3ko Euskararen Eguneko ospakizunekin borobilduko dute egitaraua. Hain zuzen, egun hori Euskaraldiaren azken eguna izango da. 14:15ean DBHko ikasleek bideoklip lehiaketa egingo dute kultur etxean, eta San Juan eskolakoek, berriz, agurra, sari banaketa, dantza eta gaztaina jatea egingo dituzte. 18:30ean Euskaraldiako diana eta parte hartzaile guztien argazkia egingo da eta eguna borobiltzeko, Eizmendi tabernan luntxa izango da, Euskaraldiako txapa daramaten herritarrentzat.