Aurten ere, Kalebeheran festak

Beste behin Kalebeherako festak antolatu dituzte Alegian. Jaiak ospatzeko gutxi falta zela, azkenean sortu da lantaldea festak antolatzeko eta aurten ere izango dituzte hiru egunez ekitaldiak, ostiralean hasi eta igandera arte. Hori bai, antolakuntzatik ere laguntza eskatu dute hiru egunetan izaten diren eginbeharretarako.

Lehenengo egunean suziriekin eta buruhandiekin hasiko dituzte ekitaldiak. Aurten aterako diren buruhandiak Errota auzokoek egin dituzte. Patata tortilla lehiaketak emango dio jarraipena festari eta, nola ez, zahagiardoa egingo dute, Alegian hutsik egiten ez duen ohitura.

Larunbatean egun osoko egitaraua izango dute. Kirolak bere tartea izango du, eta eguerdiko krosean helduek eta haurrek parte hartuko dute. Arratsaldean pala txapelketa hasiko dute helduek. Bertara azaldu besterik ez da egin behar izena emateko, eta ondoren osatuko da lehiaketaren koadroa.

Bitartean haurrek eurentzako prestatutako jolasak izango dituzte. Zinta karrera klasikoa da Kalebeherako festetan eta aurten ere bere lekua izango du. Antolakuntzatik eskatu diete herritarrei zintak prestatzeko eta gero estankora eramateko. Txokolatea ere banatuko zaie haurrei, indarrak berritzeko.

Bertsolarien saioa ere ohikoa izaten da eta aurten ere larunbat gauean egingo da. Aurretik zahagiardoa izango da, eta behin bertsoak bukatuta, trikitilariek girotuko dute festa.

Azken egunean herriko dantzarien saioak emango dio hasiera festei. Sagardo dastaketa eta sardina erreak izango dira eguerdian ere, eta ondoren, bazkaltzeko paella. Bazkaldu eta gero etorriko dira pala txapelketaren eta haurrek astean zehar jokatuko duten esku pilotako txapelketaren finalak. Azkenik, festei amaiera emateko, zahagiardoa izango dute.