Maiatzeko lehen igandearekin batera, azoka ekologikoa ospatuko da, bosgarren urtez, Alegian. Hilaren 6an, beraz, 10:00etatik 14:00etara produktu ekologikoak ikusteko eta erosteko aukera izango da Beloztegiko baratze parkean.
Kimu Bat, Blasenea, Lurberry, Aldabazahar, Urtienean, Zurlan eta Aikur etxeen postuak izango dira besteren artean eta berauetan, lore, barazki, landare, fruitu txiki, gazta, ogia, esnekiak, artea, osasuna, dietetika, belarrak eta beste askotariko produktuak egongo dira ikusgai.
Horrekin batera, Aralar institutuko ikasleek pintxoak, postreak eta beste hainbat produktu eskainiko dituzte hamaiketakoa egiteko, ikas bidaiarako dirua ateratzeko helburuarekin. Loatzo musika eskolako dultzaineroek, berriz, diana egingo dute.