Alegiako Festa batzordeak aldaketa batzuk egin ditu Leiho eta Balkoi Dotoreenaren Lehiaketako oinarrietan. Orain arte, parte hartu nahi zutenek izena eman behar izaten zuten baina aurten ez da hori egin beharrik izango. Epaimahaiko kideak herriko kaleetan ibiliko dira uztaileko lehen astean eta modu horretan herriko leiho eta balkoi guztiak aztertuko dituzte.
Hainbat irizpide izango dituzte kontuan balorazioak egiterakoan: kolorea, landareen aniztasuna, estetika, konbinaketa eta txukuntasuna. Ohi bezala, epaimahaiko kideak gai horretan adituak diren pertsonak izango dira eta beraien erabakiaren berri Alegiako jaietan emango dute. Uztailaren 16an, igandea, 12:15ean emango da emaitzen berri eta sari banaketa ere bertan egingo da. Irabazleak 200 euroko opari txartela izango du Alegiako saltokietan erosketak egiteko. Bigarren sailkatuak 125 eurokoa eta hirugarrenak 75 eurokoa. Saria jasotzera egunean bertan joan beharko da eta epaimahaiaren erabakia behin betikoa izango da.
Berrikuntza hauekin, antolatzaileek herritarrak leiho eta balkoiak zaintzera eta txukun mantentzera bultzatu nahi dituzte. Leiho eta balkoiak apaintzeko garai bateko ohitura berreskuratu nahi da, txukun mantenduta ingurumenari eta herriaren itxurari ere onura ekartzen diolako.